07 March 2015

ബഹുമാനപ്പെട്ട കെജ്രിവാളിനോട്,


ഞങ്ങള്‍ ആവേശപൂര്‍വ്വം ഏറ്റുവാങ്ങിയ താങ്കളുടെ ഈ വാക്യം ഓര്‍മ്മിക്കുമല്ലോ "മൂന്നാംകിട ഭരണത്തിന്‍റെ ഇരയായ ഒന്നാംകിട പൗരന്മാരാണ് ഭാരതീര്‍"

അഴിമതിയുടെ ശാപം കൊണ്ട് മരണാസന്നമായ ഈ മഹരാജ്യത്തിന്‍റെ അവസാന പ്രതീക്ഷ എന്ന നിലയിലാണ്  ആം ആദ്മി പാര്‍ട്ടിയുടെ ഉദയവും, അതിന്‍റെ അമരക്കാരനായ താങ്കളെയും ഞങ്ങള്‍ സാധാരണക്കാര്‍ ഹൃദയത്തിലേറ്റിയത്. നിലവിലെ ഏത് രാഷ്ട്രീയപാര്‍ട്ടിയില്‍ നിന്നും വിഭിന്നമായി ഉയര്‍ന്ന വിദ്യാഭ്യാസ യോഗ്യതയും, ചിന്താശേഷിയും, വിവേകവും, ലക്ഷ്യബോധവും ഉള്ള ഒരു നേതൃനിര ഈ പാര്‍ട്ടിക്കുണ്ടെന്നതില്‍ ഞങ്ങള്‍ അഭിമാനിക്കുകയും ഉള്ളാലെ അഹങ്കരിക്കുകയും ചെയ്തിരുന്നു. അഴിമതി രഹിതമായ ഒരു രാജ്യം സ്വപ്നം കാണെനെങ്കിലും അവസരം തന്ന ഈ പ്രസ്ഥാനത്തിന്,  രാജ്യത്തിലെ കോടിക്കണക്കിന് സാധാരണക്കാരായ ജനങ്ങള്‍ക്ക് അല്ലലില്ലാതെ ജീവിക്കാനുതകുന്ന ഒരു ഭരണക്രമം കൊണ്ട് വരാന്‍ കഴിയുമെന്ന് ഞങ്ങള്‍ ഉറച്ച് വിശ്വസിക്കുന്നു.  സ്വന്തം നില്പിനായ് അഹോരാത്രം അദ്ധ്വാനിക്കുന്നതിനൊപ്പം തന്നെ ഈ പാര്‍ട്ടിക്കുവേണ്ടി പ്രവര്‍ത്തിക്കാന്‍ ആയിരക്കണക്കിന് യുവാക്കള്‍ ഇന്ന് തയ്യാറായി നില്‍ക്കുന്നു. അങ്ങനെ പ്രതീക്ഷയുടെ കൊടുമുടിയില്‍ നില്‍ക്കുന്ന സാധാരണക്കാരായ ഞങ്ങളെ ഈ കഴിഞ്ഞ ദിവസം കേട്ട വാര്‍ത്തകള്‍ തികച്ചും നിരാശരാക്കി. ഉയര്‍ന്ന ബോധവും, അച്ചടക്കവും  പുലര്‍ത്തുന്ന നിങ്ങള്‍ക്ക് ഒരു മേശക്കു ചുറ്റുമിരുന്നു ചര്‍ച്ച ചെയ്ത് പരിഹരിക്കാവുന്ന വിഷയങ്ങള്‍ ഇപ്രകാരം പര്‍വ്വതീകരിച്ച് പൊതുമദ്ധ്യത്തിലേക്ക് വലിച്ചിഴച്ചത് തികച്ചും അനുചിതമായി. വിലകുറഞ്ഞ രാഷ്ട്രീയ ചര്‍ച്ചകളും നീക്കുപോക്കുകളും ഈ പാര്‍ട്ടിയില്‍ കാണാന്‍ ഞങ്ങള്‍ ഒട്ടും തന്നെ ആഗ്രഹിക്കുന്നില്ല.  തുടക്കത്തില്‍ പറഞ്ഞ അങ്ങയുടെ തന്നെ വാക്യം  "മൂന്നാംകിട ഭരണത്തിന്‍റെ ഇരയായ ഒന്നാംകിട പൗരന്മാരാണ് ഭാരതീര്‍" എന്നത് ആം ആദ്മിയെയും  വിലയിരുത്തെപ്പെടാന്‍  ഇടവരരുത്. ആയതിനാല്‍ തന്നെ രാഷ്ട്രീയകാര്യസമിതിയില്‍ നിന്ന് നിര്‍ഭാഗ്യവശാല്‍ പുറത്ത് പോകേണ്ടിവന്നവരെ പരസ്പരം ചര്‍ച്ചചെയ്ത് തിരികെ കൊണ്ടവന്ന് രാഷ്ട്രീയ ചരിത്രത്തില്‍ ആം ആദ്മി പാര്‍ട്ടി ഒരു പുതിയ മാതൃക സൃഷ്ടിക്കണമെന്ന് എളിമയോടെ അതി ശക്തമായി ആവശ്യപ്പെടുന്നു.

എന്ന് ഞങ്ങള്‍ സാധാരണക്കാര്‍

(ഈ അഭിപ്രായത്തോട് യോജിക്കുന്നവര്‍ ഇത് share ചെയ്യുമല്ലോ.)

No comments:

Post a Comment