ടാനും കോസും തീറ്റയും
കണക്കുമാഷ് പുഴുങ്ങിത്തരുംന്നേരം
കറുത്തുമേഘം തകര്ത്തിറങ്ങിയാല്
വീടെത്താനേത് കുടപിടിക്കുമെന്ന
ഭയമായിരുന്നു മനസ്സു നിറയെ
അതുകൊണ്ടാകും ജീവിതമിപ്പോഴും
ന്യൂനകോണുകളില് തങ്ങിനില്ക്കുന്നത്
കുതിച്ചുയരുന്ന ജീവിത-
ച്ചിലവുകളിലാശങ്കവന്നപ്പോള്
ചരിത്രമറിയില്ലെന്ന പരിഹാസം കേട്ടത്
സാമൂഹ്യപാഠങ്ങള് ചവച്ചരക്കുമ്പോള്
അന്തിക്ക് കള്ള് ബാക്കിവച്ച വിയര്പ്പ്
വീതം വക്കുന്ന അച്ചന്റെ ചിത്രം
മനസ്സില് നിന്നതുകൊണ്ടാകാം
കണ്ണില് വിശപ്പ് തിമിരം
വരച്ചതുകൊണ്ടാകാം
ഒരേ ബെഞ്ചിലിരുന്നവര്
ചില പടികള് കയറിപ്പോയത്
കണ്ടിട്ടും കാണാതെ പോയത്
ഏതു ഘട്ടത്തിലാണ് എന്റെ
മുറിപ്പാടത്തിലേക്കൊരു
പുഴയൊഴുകിവന്നത്?
എങ്കിലും......
ഇന്നും എച്ച്ടുഓ കാണാത്ത
പാടങ്ങളെ അറിയാതെയാണ്
വെള്ളക്കോളര് കര്ഷകര്
വിത്തുകള് വിഴുങ്ങിത്തുപ്പുന്നത്