04 January 2013

ബോണ്‍സായ്

തണ്ടില്‍ നിന്നും ചിറം
പൊട്ടിയൊലിച്ചപ്പോഴാണ്
തൈയുടെ പ്രായം
ഭയപ്പെടുത്തിയത്

മാനംമുട്ടെ വളര്‍ന്ന് 
കാറ്റത്തൊന്നുലഞ്ഞാല്‍
കുടുംബത്തോടെ മണ്ണടിയും

വേഗമൊരു ചട്ടിയിലാക്കി
മൂര്‍ച്ചയുള്ള വാക്കുകൊണ്ട്
ചില്ലകളെല്ലാം വെട്ടിയൊതുക്കി

കൊടുംകാറ്റില്‍പ്പോലുമിലയനക്കം
അയലത്തോളമെത്തരുത്

ചിലവേരുകളും സമയംപോലെ
അറുത്തു മാറ്റണം
പരിധിവിട്ട് വളര്‍ന്നാല്‍
താങ്ങാനീച്ചട്ടിക്കുമിടംപോരാ

കായ്കനികള്‍ മൂപ്പെത്തുംമുമ്പേ
കൊത്തിപ്പറിക്കാന്‍
കഴുകന്മാരെവിടെയും
ഒളിഞ്ഞിരിക്കുന്നു

ചില ചില്ലകളെ താഴോട്ടും
ഒതുക്കിയെടുക്കണം
തണ്ടിന്‍റെ നിറവും ഇനവും
ചൂണ്ടി നടക്കുന്നവരുണ്ടത്രെ!

വളര്‍ച്ച മുരടിച്ചാലെന്താ
വിലപറയാത്തെരു തടിയായ്
എന്‍റെ കാഴ്ചവെട്ടത്തുണ്ടാകുമല്ലോ!

No comments:

Post a Comment